«Qazaq radïolarınıñ» qızmetkerleri bir kündik jalaqısın qayırımdılıqqa jumsaydı

10:49, 11 aqpan 2019   420

Bul twralı «Qazaq radïoları» JŞS bas dïrektorı Qurmanbek Jumağalï «Qazaqstan» Ulttıq telearnasınıñ «Tañşolpan» bağdarlamasına bergen suxbatında mälimdedi. Bir ğasırlıq tarïxı bar Qazaq radïosı osı waqıtqa deyin 55 mln-ğa jwıq qarajatpen muqtaj jandarğa kömek körsetken.

11 aqpannan bastap «Qazaq radïoları» qayırımdılıq marafonın jarïyalaydı. Şara 28 aqpanğa deyin jalğasadı.

«Büginnen bastap «Qazaq radïoları» JŞS-nıñ qızmetkerleri bir kündik jalaqısın qayırımdılıqqa jumsaydı. Osı bastama arqılı barlıq qazaqstandıqtarğa ündew tastasaq degen oyımız bar. Osı nïetti ulttıq kompanïyalar, memlekettik mekemeler, bïznes qawımdastığı, şağın jäne orta bïznes ökilderi qoldasa deymiz. Qazaq qaşanda märttigin joğaltpağan. Elimizde kömekke zärw jandar köp. Solarğa kömektesw kerekpiz», - dedi Qurmanbek Jumağalï.